عجينة مناقيش
بواسطة: راما
تاريخ الوصفة: 03/03/2021
مكونات ومقادير وطريقة عجينة المناقيش :
بحط كاستين طحين مع كاسة ماء
و٣/٤ كاسة حليب سائل
ومعلقتين كبار سكر
ومعلقة كبيرة خميرة
ومعلقة كبيرة بيكنغ باودر
ومعلقة كبيرة لبن
نحلط المكونات مع بعض ونتركها حوالي ال ربع ساعة يرتاحوا
وبعدين برجع بضيف 3 كاسات طحين ورشة ملح حسب الرغبة وربع كاسة زيت نباتي
(ملاحظة مابدي العجينة تكون كتير شادة لانو وقت المد رح نزيد الطحين)
وبعد العجن برجع بريح العجينة حوالي النصف ساعة
هلأ السر بالعجينة انو تطلع كتير منيحة وطرية هيه انو وقت بدكون تمدوا العجينة بلكا من الطرفين بالطحين وبمدا قطعة قطعة متل افران الفطاير ما كانوا يعملوا
وكذا العجينة جاهزة للاستخدام
اقتراحات حشوات مناقيش :
حشوة خليط الجبنة :
كوب من الجبنة البيضة او الجبنة التركية
كوب من جبنة الموزاريلا
بيضة واحدة
ملعقة كبيرة سمن حيواني
رشة فلفل ابيض ورشة ملح خفيفة حسب ملوحة الجبنة
بقدونس
بخلط جميع المقادير مع بعض
وبتحصلوا على اطيب جبنة للفطاير
حشوة المحمرة
عبارة عن معلقتين كبار من دبس البندورة
معلقة كبيرة دبس فليفلة
٢ ملعقة صغيرة بصل بودرة
١ملعقة صغيرة ثوم بودرة
نصف ملعقة صغيرة بهار اسود او سبع بهارات
٢ ملعقة صغيرة حبة البركة
٣ ملعقة كبيرة زيت زيتون
٢ ملعقة كبيرة زيت نباتي
بخلط كل المقادير مع بعض وبتجنب وضع الملح لانو دبس البندورة بكون فيو ملح
وهيك بتكون جاهزة
وصحتين والف عافية
