طريقة عمل ايدام بيض
بواسطة: غروب مكة
تاريخ الوصفة: 28/07/2016
طريقة إيدام البيض وبصراحة مافي مقادير معينة انا اطبخ بالتقدير
المقادير:
بيض العدد حسب عدد اللي بياكلوا
صلصة +طماطم مطحونة <حسب الرغبة ايهم استخدمتوا تضبط
بهارات =كمون كزبرة ناشفة فلفل اسود مطحونين
كركم ورق غار
فلفل حسب الرغبة سواء بقرونه او مقطع
بصل مفروم يعني بصلتين متوسطات (البصل شوي اكثر من الكشنة المعتادة علشان يطير ريحة البيض)
ثوم مفروم+زنجبيل
رشة هيل مطحون حسب الرغبة يمكن الاستغناء عنه علشان زنخة البيض
كزبرة خضرا مفرومة
الطريقة :
نسلق البيض ونقشره وبعدها نجيب مقلاية ونحط فيها شوية زيت ونقلب البيض فيها شويات لما يتحمر
من كل النواحي
ونحطه على ورق نشاف او مصفاية
طبعا هالطريقة اول مرة اجربها امس وهي الاصلية بس البيض تطلع قشرته زي الجلد عندنا يحبوه كذا
وانا عادة اسويه بدون قلي وبالطريقتين لذيذ
نجيب قدر الطبخة
نحط زيت انا احب الزيت شوي كثير للكشنة واضيف الكركم تقريبا ملعقة اكل ممسوحة وورق الغار
ونضيف البصل ونقلبه لما يذبل نزيد الثوم والزنجبيل والفلفل وبعدها البهارات ونقلبهم شويات لما يتحمروا
نضيف الصلصة ونتركها تتسبك شوي وبعدها نضيف الطماطم ونتركها تاخذ نكهة الكشنة
وبعدها نضيف موية وملح ونغطيهم
نرجع للبيض نجيب عود شوي ونخرم البيض من كل النواحي علشان ياخذ النكهة تمام لما نسقطه في
القدر
واخيرا نجيب البيض ونسقطه في القدر ونخليه يفور شوي مع المرقة علشان ياخذ النكهة واللون
ونضيف قبل نطفي مباشرة كزبرة مفرومة ونغطي القدر ونطفي النار
ونغرفه بالصحن
نقدر نقدمه مع العيش=الخبز او مع الرز الابيض
