طريقة عمل فيتوتشيني الفريدو بالدجاج من المطبخ الايطالي بالصور

بواسطة: Mrs.minnie

تاريخ الوصفة: 21/12/2015

http://www.encyclopediacooking.com/upload_recipes_online/uploads/images_%D9%81%D9%8A%D8%AA%D9%88%D8%AA%D8%B4%D9%8A%D9%86%D9%8A-%D8%A8%D8%A7%D9%84%D9%81%D8%B1%D8%A7%D8%AE-%D8%A8%D8%A7%D9%84%D8%B5%D9%88%D8%B110.jpg

انا عملت طبق من المطبخ الايطالى
اسمها فوتشينى الفريدو تشيكن
الترجمه بقى انها مكرونه بالفرخ و المشروم و الوايت صوص
بصوا بقى من الاخر رهيبه بجد
انا قبل كده كنت في مطعم ايطالى و صحابى ف الشغل طلبوها وانا قلتلهم هاكلها على ضمانتكم و طلبتها و من ساعتها طعمها مش بيروح من دماغى
و بعد تفكير اخيراااا عملتها

خلاص خلاص هخش ف الموضوع

المقادير لعمل الفيتوتشيني :

مكرونه فيتوتشيني اوشرايط ( اشتريتها من كارفور ب 10.5) و ممكن مكرونه فيونكات او قوقعه او اسباجتى اللى موجود عادى
1/2 ك وراك فراخ مخليه و مقطعه قطع ( او صدور فراخ ) اللى موجود عندك
علبه مشروم مقطع
بصله متوسطه مبشوره - 2 فص ثوم مفروم
فلفل اخضر مقطع صغير - فلفل الوان احمر و اصفر مقطع صغير - زيتون اسود مخلى مقطع صغير ( اللى موجود عندك منهم و لو عندك كلهم تمام )
ملح -فلفل - جوزه الطيب -2 مكعب مرقه دجاج - بهارات
نقطتين خل لتتبيل الفراخ

الوايت صوص :
( 2 معلقه كبيره دقيق - 2 معلقه كبيره سمن او زبده - 3 كوب لبن - علبه صغيره او كوب كريمه لبانى بتاعه جهينه العلبه الخضراء- او اى نوع كريمه لبانى و لو مش عندك كريمه لبانى عادى مش مهم )
جبنه موتزاريلا او شيدر مبشوره حسب الرغبه

دى المكرونه الفيتوتشيني

دى المكونات

الطريقه لعمل الفيتوتشيني :

قبل اى حاجه هنقطع الفراخ و نتبلها بالملح و الفلفل و معلقه خل و نحطها ف الثلاجه و نبتدى نسلق المكرونه بقى

اولا

نسخن مياه و لما تغلى نحط نقطه زيت و ملح و نحط المكرونه الفيتوتشيني و تقلب لمده دقيقتين علشان متلزقش و منغطيش المكرونه . و نصفيها لما تستوى و ادى شكلها المكرونه الشرايط

ثانيا

هنجيب طاسه او حله و نحط معلقه سمن و نحط عليها البصله المبشوره و لما تدبل نحط الثوم لحد ما البصله تبتدى تصفر .

هنجيب الفراخ اللى احنا متبلينها و حاطينها ف الثلاجه و نحطها ع البصله و نقلب لحد ما لون الفراخ يبقى ابيض و نتبلها بشويه ملح صغيرين و فلفل و جوزه الطيب و مكعب الماجى و رشه بهارات صغيره اوى و نحط عليها ربع كو بايه مياه و نغطيها علشان تستوى

اول ما الفراخ تستوى ننزل عليها بالمشروم و نقلب

و نحط الفلفل الاخضر و الاصفر و الاحمر و الزيتون الاسود و نقلب دقيقتين كده و نطفى عليهم

ثالثا

الوايت صوص
نجيب حله و نحط فيها معلقتين سمنه و معلقتين دقيق و نقلبهم و ننزل عليهم باللبن و نقلب زى البشاميل كده و لما يبتدى يتقل نحط عليهم كوب الكريمه اللبانى و نحط رشه ملح صغيره و مكعب ماجى و رشه جوزه الطيب و رشه فلفل اشود بسيطه اوى
هو عامل زى البشاميل بس اخف من البشاميل يعنى ولا سائل اوى ولا تقيل اووى بيبقى وسط

نحط الوايت صوص ع الفراخ و المشروم و نحط عليهم الجبنه المتزريلا و نقلب

بالنسبه للتقديم ممكن تحطى في الطبق شويه مكرونه و عليهم شويه من الصوص بالفراخ و المشروم زى كده

او ممكن تقلبى المكرونه و الصوص ف حله و تقدمى زى كده

و بألف هنا و شفا بجد حلوه و تستاهل انكو تجربوها .. يلا ابدعوا ف المطبخ الايطالى

ف امان الله