المفتول الفلسطيني بالخطوات المصورة
بواسطة: sweety roro
تاريخ الوصفة: 07/09/2012
بقدملكم وصفة يمكن بتعرفوها
(المفتول الفلسطيني ) بالخطوات المصورة من مطبخي
المفتول اكلة تراثية قديمة ومشهوورة كتييير ببلادنا
وكل منطقة الها طريقتها الخاصة فيها وبتميزها عن باقي المناطق
اليوم بقدملكم المفتول على الطريقة الغزاوية (مدينة غزة)
المفتول عبارة عن طحين وسميد وزيت ومية بينعجنو بطريقة معينة وبيتغربلو بالغربال (مصفاية خاصة بالمفتول فتحاتها كبيرة ) بيزل منها المفتول دوائر صغيرة او كرات صغيرة
طبعا عمل المفتول من الالف للياء بياخد فترة طويييييييييييييييلة لهيك نظرا لظروف الحياة بهالزمن السريع
صار المفتول ينباع بالسوبرماركت مثله مثل الرز وغيره من الاشياء.
يلا نبدا بمفتولنا لليوم
المفتول بيكون ناشف لهيك لازم نضيف عليه مية ساخنة علشان يصير طري وتنتفخ حباته
بنضيف مية لاتكون مغلية ولا باردة
تقريبا كاستين لكل 500 غ
وهي المفتول صار عنا هيك
بعد ما اضفنا المية بنتركه تقريبا ربع ساعة
علشان ينتفش ويطرى كويس
بهالوقت بنحضر البصل للمفتول
المفتول بيحتاج بصل كثيييييييييييييير
انا ما عملت غير 6 بصلات صغار لان زوجي ما بياكل البصل
البصل بنقشره من القشرة الخارجية
وبنحمل فيه حز بالسكينة من الجنب
وبنحطه بطنجرة كبيرة ليكون تحت المفتول الحب
لان ما عندي مفتولية ( طنجرة خاصة بالمفتول )
قررت اخترع مفتولية
جبت مصفاية كبيرة حديد
حطيتها فوق الطنجرة بالهشكل
وحطيت المفتول فيها
وبديت اجهز عروسة المفتول (تتبيلة المفتول بس بنسميها عروسة المفتول )
بتكون عبارة عن بصل وفلفل وجرادة خضراء وملح )
بنهرسهم بهالشكل
وبنعمل حفرة في وسط المفتول وبنضيف العروسة بالنص علشان نغطيها بالمفتول وتستوي كويس عالبخار
وبيكون عنا بهالشكل
بنغطيها بشوية مفتول طبعا
وبغطيها بغطاء الطنجرة
بس لان اللي عندي صارت شبه مفتولية (طنجرة المفتول)
والمفتول لازم يستوي عالبخار يعني مش لازم يكون في فتحات يطلع منها البخار من الطنجرة
لهيك شوي عملت
جبت بشكير المطبخ وحطيته عالفتحة اللي بيطلع منها البخار
وصارت طنجرتي بهالشكل
بما ان هالخور خطييييييييرة
وممكن لا سمح الله يوقع البشكير عالنار لا سمح الله وينحرق البيت
لازم تنتبهي كتييييييييييييييير مو شوي
وتخلي عينك عشرة على عشرة
المفتولية اللي بقولكم عنها
جبتلكم صورة عن النت
اللي تحت بيكون فيه البصل والمي او الدجاج والمي بيستوو
وبخارهم بيطلع لفوق عن طريق فتحات زي فتحات المصفاية بالطنجرة اللي تحت
وبيك بيستوي المفتول عالبخار >>> فيزياء هههه
طيب نرجع تاني
بنفس الوقت بنسلق الدجاج بطنجرة تانية
وعادي ممكن نسلقه بطنجرة المفتول اللي تحت
بس انا طنجرتي ما بتكفي فسلقته بطنجرة تانية >> كم مرة قلت طنجرة ؟؟
وبيكون الدجاج بهالشكل
بس تقريبا يكون نص استواء
بنضيف الكركم
الملح
البهارات
الفلفل الاسود
والكمون
ونص ملعقة معجون طماطم
بيصير عنا بهالشكل
بيستوي الدجاج
بنشيله من اليخنة علشان نشويه
بنحطه بصينية الفرن وبنرش الوجه للدجاج
ببهارات دجاج ورشة زيت او سمنه ليتحمر
وبنحمره
وبيكون عنا كدة
بعد ذلك
بعد مرور تقريبا ساعة ساعة وشوي بيكون المفتول استوى
احنا بنقول ( تهبل المفتول او هبلنا المفتول بفتحة مشددة على حرف الباء) > درس عربي
بنشبله المصفاية بالمفتول اللي فيها
بيكون تحت المفتول البصل اللس ستويناه
بيكون بهالشكل
بيكون مستوي بس مو دايب
المهم بنشيله وبنحطه على مرقة الدجاج (اليخنة )
علشان يغلي 10 دقايق فيها ويكتسب النكهة من الكركم والبهارات )
وبنفس اليخنة بنحط معاها حمص مسلوق
نرجع للمفتول اللي بالمصفاية >> دوختكم
المهم بنشيله من المصفاية وبنحركه علشان العروسة (التتبيلة ) تتوزع على المفتول
بيصير عنا بهالشكل
بنعمل فيه فتحه بالنص وبنحط اصبع زبدة علشان تسيح الزيدة
ويكتسب المفتول طعم وريحة تجنن
بنغطيه وبنتركه لحد ما الزبدة تسيح يعني 5 دقايق تقريبا
بعدها بنحركه لتتوزع الزبدة لكامل المفتول
وبنكون خلصنا طبختنا
المفتول استوى وصار جاهز
اليخني استوي وحطينا عليه البصل والحمص الحب المسلوق واكتسبو النكهة
الدجاج استوى
بيبقى علينا تجهيز السفرة
بنسكب اليخني بهالشكل
والمفتول بهالشكل
وبنزينه بالحمص الحب
وبتصير سفرتنا بهالشكل
وصورة من فوق
وصحة وهنا وعواف
جربوها كتتتتتتتتتتتتتتتتتير يمي يمي يمي
امووت بهالاكلة انا بالذات من ايدين جدتي الله يطول بعمرها ويشفيها
واشوفها على خير وسلامة
وما تنسو الحلى
تفضلو
ان شاء الله يارب تعجبكم وصفتنا وتطبقوها
