متبل سوري بالخطوات المصورة
بواسطة: إيثار الشام
تاريخ الوصفة: 03/09/2012
أخواتي الفاضلات , مية وردة و فلة و ياسمينة , و أحلى مسا
راح نبلش , بتعريف المتبل : هوي نوع من المقبلات , كتير منتشر و محبوب عنا بسورية و ببلاد الشام , و هلأ عم ياخد شعبية ببقية البلدان , بالعادة منحضره من البيتنجان المشوي أو المقلي أو من الكوسا المقلية , أو حتى من البطاطا المسلوقة , بحيث نضيف اللبن و الملح و الطحينة و ممكن التوم , و نخلط الكل مع بعض , و هيك بيطلع عنا أحلى صحن متبل
طبعآ هالطريقة , هيي الأصلية للمتبل , و في ناس بيحبو يحطوا إضافات , مو مشكلة بترجع لذوق الشخص و رغبته .
متبلنا اليوم , هوي متبل اليقطين
بكل بساطة , هالمتبل , من أطيب أنواع المتبل , كتتير كتير , طعمته طيبة و بتجنن , و خصوصآ , لمن منحط على وجهه : زيت الزيتون , و جوز مفروم , امممممممم يا سلام شو طيب
نصيحتي : لاتمروا , مرور الكرام عالموضوع , الطبق كتير بسيط , جربوه , وراح تعتمدوه على طول , أما الطريقة :
راح أعطي مقادير لصحن كبير ( أو صحنين صغار )
يقطين مقطع مكعبات و مقلي بزيت غزير ليستوي
نضع اليقطين بالخلاط
و نضع فوقه اللبن الزبادي , أنا استخدمت مقدار نصف كوب كبير للكمية الظاهرة في أول صورة
نضع الملح , و الطحينة , و كمية الطحينة حسب الرغبة
هلأ : منشغل الخلاط على أقل سرعة , و لمدة قصيرة , و من ثم نوقف الخلاط , و نحرك المتبل بالملعقة , و من ثم نشغل الخلاط , و هكذا , حتى تتجانس المكونات مع بعضها
و هنا : نتذوق بالملعقة , و إذا في داعي نضيف اللبن الزبادي أو الطحينة , و نخلط من جديد
عندما ننتهي , نسكب المتبل في صحن التقديم , لاحظي شكل المتبل , و قوامه
الآن : نفرش المتبل بالصحن , و نضيف زيت الزيتون , و أنا هون زينت الصحن بوردات قشور البندورة و النعنع , و حبة زيتون أسود
و هون زينته بالسماق , لأن السماق فوق المتبل , بيعطي نكهة طيبة و منظر حلو
و آخر شي أضفت الجوز المفروم , و كترت , لأن متبل اليقطين , كتييير طيب مع الجوز
( شو رأيكن بهالصحن ؟ )
شوي صار الصحن معجوء بالشغلات يلي على وجهه , بس و الله اشتهيتكن تتذوقوه , على قد مو طيب
مع باااااااقة ورد , و كل الود
