طريقة عمل وجبات دجاج كنتاكي بالصور
بواسطة: بحب بلدي
تاريخ الوصفة: 12/03/2012
cook to learn | how to make a Recipes Kentucky Fried Chicken with pictures | arabic cooking recipes
احب اطلعلكوا كل أسراري
النهاردة بجد وجبات كنتاكي ف بيتك
مع فارق النظافة والاطمئنان لان انا اكثر حاجه بتخوفني هو الاكل المقلي برة
يعني مش عارفة الزيت دا اتقلي بيه كم مرة وكمان الدجاج اتغسل كم مرة واذاي
عندي فوبيا م الغسيل بقعد أغسل ف الدجاج يجي عشر مرات بالدقيق والملح والليمون وانقعها شويه
وأهم حاجه ف اي وصفة دجاج يكون فيه تتبيلة
لازم ولابد انك تحطيه ف مصفاة يصفي ماؤه كويس جداً
السر ف ايه من خلال تجاربي المطبخيه انك لو غسلتي الدجاج وحطتيه ف التتبيلة ع طول هايكون ملوش طعم
لان لسه فيه مايه وهاتختلط بالتتبيلة فتقلل من ملحها وتركيزها
دي نقطة بسيطه ولكن بالنسبة لي مهمة
يلا ع المقادير
( التتبيلة)
لكل دجاجة
ليمونه صغيرة
م ك خل
م ك كاتشب يعطي مزازة
2 م ك زبادي
بياله زيت ( بتطري الدجاج)
4 فص ثوم مهروس
ملح + فلفل اسود+ هيل مطحون+ شطة مجروشه+ بابريكا
الطريقة:
نقطع الدجاج علي ثماني قطع وغسلها كويس مثل ماوضحت سابقاً
وانا بعمل شقوق ف كل قطعة بالسكينه لضمان الاستواء
نخلط مكونات التتبيلة مع بعض كويس جداً ثم نضع فيها الدجاج
وندخله الثلاجه قبل بيوم
وكذلك صدور الدجاج
عشان اعمل بيها
فيلية الدجاج الكرسبي
وmighty zinger
خلاص كدة تبلناهم ودخلناهم الثلاجه
نيجي بقي لسر المطاعم اللي بيخلية كرانشي ولذيذ
وده طبعاً من خلال الطرق الكتيير اللي جربتها
اكتشفت ان الدجاج او الفيليه مش بيحطوا فيه
بقسماااااط ابداً
وانا لاحظت دا من نفسي يعني اختراااعي
الخلطة السرية هي :
دقيق مخلوط معه معلقة نشا ونفتت علية كورن فليكس خلي اوعي تطحنيه انا بكسرة بين راحة اليدين
بحيث يكون في شوي ناعم وشوي خشن
وكمان بحط شوية شطه مجروشة وفلفل اسود وسنة ثوم بودر
ويقلب مع بعض كويس
والبهارات اللي مع خلطة التغليف كمان من ضمن الأسرار
ونقلبهم مع بعض
ونكسر ع الدجاج بيضة مخفوقة وكذلك علي الفيليه
ونقلبهم مع بعض ونغمسهم ف الخلطة
والسر الثالث هو
لازم تحطي الدجاج بعد ماغلفناه ف الثلاجة لمدة ساعة ولو مستعجله حطيه ف الفريزر نصف ساعه
عشان يلتصق التغليف ومايفكش منك ف الزيت
ثم يحمر ف زيت غزير
انا صراحة قليته ف القلاية بحس انه بيستوي احسن وتحميره بيكون كويس
دي قطع الدجاج مقرمشة وطريه ومستويه ولذيذة
ودي قطع الفيليه ممكن تقدميها مع بطاطس او ساندويتش
ودا الساندويتش قدمته بنفس مكوناتهم
حطيت مايونيز مع شطة مجروشة وخس وقطع الفيلية وشريحة جبن وأكيد البطاطس المقليه
انا عن نفسي بمووووت فيه
انا متأكدة ان لو جربتوه هايعجبكوا ومش هاتشتروه تاني
وان الكل هايسألك عنه
وكمان دي من الوجبات اللي الأولاد بتحب تاكلها
اعمليها بيتك وأكلي أولادك وانتي مطمئنه
والف شكر للجميع
دمتم بود وحب
في رعاية الله وأمنه
والحمد لله الذي أطعمنا وسقانا وكفانا فكم ممن لا كافي له ولا مأوي
