طريقة عمل مكرونة تاليتلي وبيكاتا اللحم مع الصوص الخطير واللذيذ بالصور
بواسطة: بحب بلدي
تاريخ الوصفة: 07/02/2012
السلام عليكم ورحمة الله وبركاتة
مساءكوا فل وياسمين
أكيد كلكوا سمعتوا عن خبر إقفال مطعم تشيليز لان في أخبار قالت انهم كانوا بيستخدموا
لحم الحمير( لا أصدق)
وفي أخبار قالت ان الاكل مدة صلاحيته منتهية
ومش هانقدر نقول غير كل واحد ضميرة شاهد علية
ولذلك حبيت أقدم لكم طبخة النهاردة ودي بدون مبالغة احسن واطعم والذ من اي مطعم اكلتي فية
والصراحة انا اكلت ف مطاعم كتير وبطلع خسرانة فلوسي
آخر مرة كنت ف استيك هاوس والله ما أكلنا غير سلطة سيزر واللحم تركناه
الحمد لله علي النعمة ربي يحفظها من الزوال
وهاي الاكله بعد ما أكلها ابو الشباب قالي خلاص مفيش مطاعم تاني
طولت عليكم بالمقدمة بس الحماس لسة الطعم ف فمي لانها كانت غدانا اليوم
مقادير بيكاتا اللحم:
لحم استيك شرايح
بصلة مفروما ناعم
م ك ورشيستر صوص
م ك صويا صوص ( وطبعا تزودي الكمية ع حسب كمية اللحم)
نصف كوب كريمة خفق
ملح قليل+ فلفل اسود
طبعا المفروض فيها مشروم بس الصراحة انا مابحبة واللي بيحبة يحط مشروم أكيد
الطريقة:
نغلف شرايح اللحم بالدقيق عشان يتقل الصوص
ونضع ف طاسة ع النار معلقة زبدة وشوية زيت انا خففت الدسم وحطيت زيت بس
ثم نشوح فيها اللحم لغاية مايحمر م الجانبين
ثم نرجع نشيلها من الطاسة ونضيف البصل مع رشة ملح
ثم نضيف عليهم اللحم مع الصويا صوص والورشيستر صوص ونقلبهم مع بعض كويس
ودي صورتهم للي مايعرفهم
وانا زيادة حرص ضيفت كوب مرق لاني بحب اللحم مستوي
وسيبتهم علي النار وغطيتها وهديت النار خالص
ف هذه المرحلة نضيف الكريمة
وخلي بالك تكون النار هادية يادوب تغلي غلوتين ونطفي النار
وده شكله
ف هذه الاثناء نسلق المكرونه ف ماء مغلي وملح
ونصفية م الماء
ثم نضعها ف حلة ع نار هادية جدا ونضيف لها علبة قشدة
و3 م ك جبن سايل ونصف كوب جبن موزاريلا
ونقلبهم كويس مع المكرونة بس يتجانس الخليط ونطفي النار
وأتركة مع الطبق اللذيذ ( لايقاوم)
ودا طبقي كترت فيه الصوص مش بقدر أقاومه
مع الصوص لازم يبقي كده
انا متأكدة لو جربتوة هاتدعولي
أتمني الموضوع يعجبكوا
في رعاية الله وامنه
الحمد لله الذي أطعمنا وسقانا وكفانا فكم ممن لاكافي له ولا مأوي
اللهم احمي مصر وسائر بلاد المسلمين
