شوربة سلق بالدجاج لذيذه مره بالصور

بواسطة: جولانار

تاريخ الوصفة: 04/08/2010

شوربة سلق بالدجاج لذيذه مره بالصور

الشوربه وهي ماشاء الله صحيه ومغذيه ولذيذه في نفس الوقت
بشرح لكم المقادير مع الطريقه والصور توضح إن شاء الله
تحمسين بصله مفرومه +صدر دجاج مسلوق ويكون مسحب او تقطعينه بالسكين قطع صغيره
وفصين ثوم مهروس كلهم تحمسينهم بملعقه زبده وملعقه زيت زيتون
حمسيهم حيل بعدين ضيفي مكعبين ماجي وفلفل اسود ناعم اشوي

http://up.hawaaworld.com/up/sites/up.hawaaworld.com/files/links/9cd818ea56273170b63f339aa6f34bca.jpeg

بعدين تضيفين 3شدات او ربطات سلق تكونين مقطعتهم وغاسلتهم زين من التراب وتفرمينهم فرم ناعم وتكونين مجهزه بعد شدتين اوربطتين كزبره خضره ومقطعتها وغاسلتها وفارمتها فرم نااااااعم
الحين ضيفيهم على البصل والدجاج المحموس (طبعا كل الخضار والبصل وكل اغراضج تجهزينهم قبل الشغل اسهل ) حمسيهم حيل لما تذبل الخضار وتحسين انها شربت الماء او قل الماء النازل من الخضار
الحين ضيفي قرن فلفل حار مفروم طبعا حسب الرغبه وظيفي 7 اكواب ماء يفضل مغلي اسرع للشغل
جهزي في زبديه اوباديه على جنب 3 اكواب ماء عادي موحار يكون من الفلتر وذوبي فيه7 ملاعق كبيره كويكر او شوفان هذه الخطوه تسهل عليج خلط الكوكر مع الشوربه بدون لايتكتل

http://up.hawaaworld.com/up/sites/up.hawaaworld.com/files/links/8a750034600b15e93f1668350fa4242c.jpeg

انا بهذه الخطوه حطيت الماء من الفلتر وبعدين ظفت عليه الكويكر مباشره لان الماء كان مومغلي لكن في حال انج تحطين ماء مغلي ي فظل انج تتبعين الخطوات الي فوق
المهم مجموع الماء يطلع عندج 10 اكواب او حسب الكثافه الي انتي تبين
خليها تطبخ على نار هاديه وقلبي بين فتره وفتره عشان ماتلزق بالقدر
بعدين ضيفي عليها عصير ليمونه وظبطي الملح لاتخلينها تطبخ اكثر من نص ساعه
لانها اصلا تقريبا ناضجه بس الشوفان يتجانس معاهم

http://up.hawaaworld.com/up/sites/up.hawaaworld.com/files/links/e133d21c2786efad750c511ce1fe7ddb.jpeg

وقدميها بالعافيه مع الليمون ياسلام فضيييييييييعه وصحيه وسهله يعني 3 في واحد