فطيرة الدجاج بالمشروم والزيتون بالصور
بواسطة: أم جورى
تاريخ الوصفة: 27/07/2010
فطيرة الدجاج بالمشروم والزيتون بالصور
جايبالكم فطيرة سهلة ولذيذة كتيييييييييييير شفتها فى التلفزيون وقلت لازمااعملها
المقادير
صدور دجاج بانيه انا عملت 4 صدور كبار
مشروم طازج أو معلب
زيتون
جبنة رومى مبشورة وموتزاريلا حسب الرغبة
فلفل رومى
12 كوب بشاميل تقيل
ملح
فلفل
زعتر ( أساسى )
عجينة الباف بسترى او ( عجينة الرقائق الهشة ) هى هى
صفار بيض للوجه
الطريقة
نشوح صدور الدجاج بعد تقطيعها مربعات صغيرة مع بصلة صغيرة وملح وفلفل حتى يتم النضج
نضيف باقى المكونات الزيتون والفلفل والجبنة الرومى انا اكتفيت بنوع واحد جبن مبشور والمشروم ( اذا كان معلب يشطف بماء ويشوح فى ملعقة زيت زيتون)
ثم الجبن المبشور
واخر اضافة البشاميل التقيل والزعتر والبشاميل يكون اتقل من بشاميل المكرونة
يعنى نص كوب دقيق ونص كوب لبن مع ملعقة واحدة زيت ونعمل البشاميل بالطريقة العادية
بالصور
كدة الحشو جاهز نيجى بقى للمهم
نجيب عجينة الرقائق أو عجينة الميل فى او الرقائق الهشة وده شكلها انا افضل نوع جربته السنبلة ودى كمان لايت علشان الناس اللى عاملة دايت والبشاميل بلبن خالى الدسم يبقى كدة كله اندر كونترول
فى منها شرايح وفى منها قطعة واحدة انا جايباها شرايح بس انا قسمتها جزئين وعجنتها علشان تبقى قطعة واحدة لانى هعملها بطريقة معينة
ولازم افردها على دقيق لانها ممكن تلزق ومعلومة كمان لكا اطلعها من الفريزر ما اسيبهاش تفك أوى يعنى عاوزاها عجينة متماسكة مش لينة
بعد كدة افردها بالمردانة
ركزوااااااااااا
بعد ما فردنا العجين هنيجى عند أوله واعمل شرايط بالسكين من الجنبين بس فى النص تكون قطعة واحدة علشان هنحط فيها الحشوة والصور هتوضح الفكرة أكتر
بعد كدة هنحط الحشوة فى الجزء اللى فى النص
وهنيجى عند أول شريحة ونقفلها بالشكل ده
وبعد كدة نقفل اللى قدامها من الناحية التانية
بعد كدة هنقفل الجزء اللى فى المقدمة علشان الحشوة ما تطلعش منه
وهكذا هنفضل نقفل واحدة يمين وواحدة شمال لحد ما تبقى بالشكل ده
ونحكم قفل الجزء اللى فى المؤخرة كويس بردو زى الجزء اللى فات فى الصورة
وهننقلها فى صينية بايركس مش مدهونة ولا حاجة وهتتنقل بسهوله خالص ما تقلقوش اهم حاجة العجينة تكون ماسكة نفسها زى ما قلتلكو
طبعا فى ناس مالهاش خلق لكل ده مع ان الشكل فى الاخر يستاهل بس انا عملت حساب الناس الزهقانة وعملتلهم طريقة تانية
ناخد الشرايح زى ماهى ونعملها على شكل مثلث بعد ما نحط الحشوة
وبطرف الشوكة نضغط على الأجناب
عارفة انكو زهقتوا خلاص اخر خطوة
هندهن الوش بصفر البيض فقط وممكن كدة من غير اى اضافات تانية على الوش
بس انا حطيت حبة البركة وجبنة مبشورة
وندخلها الفرن بس ناخد بالنا منها علشان بتستوى علطول
وده شكلها لما طلعت من الفرن
شوفوا بقى من جوه عاملة ازاى ماشاء الله روعة وطعمها يجنن والله
والف هنا وشفا على قلب الشطورة اللى هتعملها
