مجبوس روبيان خطير وسريع ويجنن
بواسطة: البيت السعيد
تاريخ الوصفة: 24/03/2010
بسم الله نبتدي انه وعيالي نحب هالمجبوس وماياخذ وقت ويجهز
وصورت الطبق في الأخير قبل ما حبايبي ياكلون،
المقادير (بتكون على حسب الكمية المطلوبة):
كيلو روبيان مقشر ومنظف ومغسول
ثلاث بصلات متوسطة ومفرومة
ثلاث فصوص ثوم مفرومين فرم ناعم
حبتين طماطم كبار مقطعين مربعات وبحجم صغير
حبة جزر كبيرة مبشورة
حبة فلفل بارد كبيرة مقطعة مربعات
حبتين آلو مقطعين قطع متوسطة
علبة صلصة طماطم
تابل وإسبنت مفرومين
بهاراتج المفضلة عني حطيت (بهار بحريني مخلوط + سنوت + كركم + هيل مطحون + رشة نعناع مطحون + رشة ليمون أسود مطحون + رشة دارسين + وكم حبة مسمار وحبة الحلوة)
- عيش مغسول حسب الكمية المطلوبة،
الطريقة:
- احمصي البصل أول شي وضيفي الثوم وبعدين الآلو،
- بعد دقايق ضيفي الجزر والطماطم والفلفل البارد
- حركيهم لين ما حسيتي بدا الماي يطلع، حطي الروبيان مع الصلصة مع البهارات والملح وخلطي الجميع، وضيفي كوب صغير ماي، وخليه ينطبخ على خفيف، علشان يلين الآلو على الأقل بس مو يصير عجين،
- وقبل العيش ضيفي التابل والإسبنت،
- أحين ضيفي العيش المغسول وكمية من الماي تكفي يا دوب تغطي العيش، لا تغرقين الجدر بالماي، وحطي زيت، وصكي الجدر بالألمنيوم وحطي النشافة تحته وعلى نار هادية،
والنتيجة أحلى مجبوس روبيان، وهالمرة ما شاء الله ضبطت عدل معاي،
وعليكم بالعافية
حبيباتي الألو: يعني البطاطس،
السبنت: يعني الحشيش
التابل: يعني الكزبرة الخضراء
