بطاطا بالطريقه الباكستانيه
بواسطة: غايتي رضا ربي
تاريخ الوصفة: 11/08/2009
السلام عليكم ورحمة الله وبركاته
اليوم حبيت احط لكم طريقة طبخ البطاطا ع الطريقه الباكستانيه
انا تعلمت الطريقه من جارتنا .... اكلها رووعه ما شاء الله عليها
قلت بجرب اسويها وبحط الطريقه لاجل عيونكم
والحمدلله اتقنت الطريقه اوكييه وطعمه كان فناااااان ولذيذ
هاي هي المقادير :
بطاطا انا خذت 12 حبه تقريبا
كزبره + ثمن فصوص ثوم + فلفل حار طبعا هاي على حسب رغبتج اذا تبين اتكون حاره اتزيدين انا خذت 6 حبات احب الحار
كيس طحينة باكوره
خمس حبات بيض
بهارات ( فلفل اسود ــ بهارات مخلوطه ـــ ملح ـــ كركم ) تقدرين تضيفين بهارات ع كيفج اللي عندج بالبيت
التحظير :
اولا نحط البطاط في يدر ونفوره الين اتصير لينه ونشيل عنه القشر
نقطع البصل >>>>> سوري ما صورته
نفرم الثوم والكزبره والفلفل الحار >>>> بالفرامه
ثم نهرس البطاط ونضيف علييه البصل المقطع والثوم والكزبره والفلفل المفروم
ثم نضيف البهارات والملح عليهم ونخلطهم حتى اتصير بهالشكل
عقب نخلط عجينة الباكوره بالماي
وهاي عجينة الباكوره
ناخذ طحينه الباكوره ونعجنه بالماي ... حتى تصير عجينه طريه شرات عجينة اللقيمات
مثل الصوره
عقب ناخذ من المقادير البطاطا المهروسه وانسويه بهاي الطريقه ونمسحه ع طرفي البطاطا المهروسه بعجينة الباكوره ونصفهم بالصحن
بهاي الطريقه
نخفق البيض في صحن .>>>>> نسيت اصور صورة البيض
نحمر الزيت في القلايه (التاوه ) ونحط كل قطعه من البطاطه المهروسه مع عجينة الباكوره في البيض
عقب نحطييه في الزيت
بهاي الطريقه
ونقلييه لين يتحمر ونجلبه ع الصوب الثاني بهاي الطريقه
وما بقولكم عقبها غير بالعافيه عليييكم
هذا الصحن اللي جهزته
بنات انا تعبت وانا انزل الصور ادري شرحي مب لين اهناك بس قلت بحط لكم الطريقه لاجل عيونكم
لانه الطريقه طلعت رهييبه وحلوه
دعوه حلوه منكن بنات (ربي يحقق اللي في بالي)
