تبسي كبة عراقي

بواسطة: بنبونة

تاريخ الوصفة: 10/03/2023

طريقة عمل تبسي كبة عراقي بالصور من وصفات مطبخ الشيف العراقية بنبونة

وصفة تحضير تبسي كبه عراقي 🇮🇶

هالتبسي كلش محبوب ومهم بالسفره العراقيه على اختلاف طرق طبخه

واكيد صرتوا تعرفون ان الطبخ العراقي دسم وغني بالمكونات اللذيذه والكبه اهم مكوناته والي نتفنن بطرق طبخها وتقديمها

عادة يسوون تبسي الكبه بالبذنجان ... او تبسي كبه بالخضار ( بذنجان وبطاطا وفلفل وطماطه ...)

انا جنت مسويه تبسي بذنجان لوحده لذلك سويت تبسي الكبه بدون خضار وهم طلع كلش طيب وانيق وفخم

الكبه الي استخدمتها هي كبه البرغل الي نستخدمها بالشوربه ...
مكونات و مقادير وطريقة عمل وتحضير تبسي كبة عراقي :

* حمست كميه كبيره من البصل المقطع شرايح مع الكركم

* بعد ما يذبل البصل ويبدي ياخذ لون ذهبي حلو نضيف عليه شرايح طماطه كميتها مثل كميه البصل ونحمسها وياه

( التبسي يعتمد بس على البصل والطماطه لذلك حطيت كميه كبيره منهم )
* نحمس معاهم ملعقه كبيره معجون طماطه
* بعد ما يذبلون نحط ملح وفلفل وربع كوب عصير حامض فريش و٣ ملاعق كبار او اكثر دبس رمان ومكعب ماجي ( اختياري )
* نحط مرق الدجاج تقريبا لتر ونحرك الخليط حتى يتجانس مع البصل والطماطه وياخذ اللون الاحمر
* اخر شي نضيف الكبه بالتبسي ( البايركس / الطاجن ) ونرصها بشكل مرتب

* ونخليها على نار هاديه حتى تستوي الكبه وتتسبك الصلصه
* وقت التقديم نزينها باوراق البقدونس

* ( استخدمت البصل الابيض لان طعمه اكثر حلاوه واخف حده من انواع البصل الثانيه )
* (دبس الرمان يختلف من نوعيه للثانيه بالكثافه والطعم الحلو او الحامض وحتى اللون )

لذلك دائما ذوقوا الطبخه وعدلوا الطعم حسب رغبتكم

بالعافيه ...
وتقدم تبسي الكبة العراقي بالعافية

صحتين وعافية ❤️