كوكيز بالزبدة المكرملة

طريقة الكوكيز بالزبدة المكرملة




كوكيز بالزبدة المكرملة طعمه مررره مررره غير وألذ من العادي لمن يضبط معك راح تدمنينه وبقوه 😋👌🏻

لعمل الكوكيز :

أول شيء بقدر صغير نضيف :

٢٤٠ جرام زبدة ونخليها على نار وسط وننتبه لها اذا بدأ يتغير لونها إلى اللون البني وبدت تطلع ريحتها خلاص نشيلها من على النار ننتبه ما تحترق 👌🏻

بعدين نضيفها بكوب قزاز وهي دافيه عادي نشتغل عليها مايحتاج تبرد ..

نخفق الزبدة مع ( ربع كوب سكر أبيض ) + ( كوب وربع سكر بني ) لمن يمتزجون مع بعض
نضيف عليهم : ( بيضة كاملة + صفار بيضة + م ك فانيلا سائلة )
نخليهم ينخفقون مع بعض زين لين يصير القوام كريمي فاتح
ثم ننزل المقادير الجافه بالتدريج وندمجهم "بالسباتولا" أو بملعقة خشب إذا ماعندك ..

" المقادير الجافة عباره عن :
( ١ كوب + ثلاث أرباع الكوب طحين أبيض ) + م ص بيكربونات الصوديوم + نص م ص ملح .. نخلطهم أول شيء مع بعض ثم نبدأ ننزلهم بالتدريج ، وآخر شيء نضيف قطع الشوكلاته ..
قطع شوكلاته من هيرشيز شبه محلاّه 340 جرام أو جالكسي أضفت 8 حبات الحبه الوحده مكتوب عليها : 40 جرام يعني المجموع : 320 جرام .

الحين نجيب صينيه ونضيف فيها ورق زبدة ونبدأ ناخذ بملعقة الآيسكريم عشان يصيرون حجم واحد ، ونترك بينهم فراغات عشان يتمددون على راحتهم مايتلازقون





ومهم جداً ندخلهم لفرن ساخن مشغل من تحت على درجة 180ْ نخليهم 10 إلى ربع ساعه بالكثير بالعاده

ما أخليهم يتجاوزون 8 دقايق إلى 10 دقايق .' ،
" كل ما طول بالفرن راح يصير ناشف . !

أول مانطلعه من الفرن ما نلمسه أبد أبد راح يكون طري جداً

اللي يحب يضيف رشة ملح بحري يضيف وهو طري عشان يمسك ع الكوكيز . .



نصائح مهمّة لنجاح الكوكيز :

١- خليط الكوكيز لمن تصلحينه وتحطينه بالصينيه ضروري تحطينه بالثلاجه ع الاقل نص ساعه وإذا طلعتيه من الثلاجه ع الفرن على طول و تكونين مشغلته قبل بربع ساعه ع الاقل

٢- السكّر البنّي المقصود فيه غالباً الناعم الرطب 👌🏻واللي يقولون ينشف أول ماتشترونه حطّوه بعلبه وفوقه حبة توست ويرجع يصير زي الرمل ملمسه وبالنسبه للسكر الأبيض تصير حبيباته ناعمه خطأ يكون مطحون بودره .
.
٣- نحط تحت الكوكيز ورق اسمه : ( بارشمنت بيبر ) هذا النوع أفضل شيء للكوكيز .

٤- الكوكيز لمن ندخله الفرن نشغله من تحت فقط على درجة ٣٥٠ فهرنهايت والرف يكون بالوسط ١٠دقايق بالكثير يصير جاهز ، الأفضل ضبط منبّه أول ماتدخلونه الفرن .

٥- طبعاً البيض والزبده ضروري بحرارة المطبخ وإذا الوصفه فيها تذويب للزبده ع النار نصير بس نركّز ع البيض وضروري فانيلا مع البيض بس استخدمو السائله وابتعدو عن البودره لأن الأفضل والأطعم الفانيلا السائله وهي متواجده بأغلب السوبر ماركات .

٦- استخدام الأكواب المعياريه أو الميزان لقياس الجرامات بالضبط لأن وصفة الكوكيز حساسه الأفضل تكونون دقيقين عشان يضبط 👌🏻 .

✨ معلومه مهمّه للكوكيز ✨

الطحين لازم يكون متعدد الاستعمالات ولمن نضيفه آخر شيء ع الخليط نحركه بالسباتولا بس مجّرد يختفي نوقف على طول الخلط لأن الطحين يحتوي على بروتين اسمه: الجلوتين لمن ينخلط اكثر من اللازم راح يصير الكوكيز قاسي بعد الخبز