حلة القرصان
بواسطة: ترف
تاريخ الوصفة: 16/12/2021
طريقة عمل حلة القرصان باللحم بالصور
حلة قرصان لذيذه
نبدأ أولا في مقادير مرق القرصان..
تحتاجين لـ
بصله مفرومه ناعم +شوي زيت
لحمه مقطعه بالحجم اللي تحبينه
انا هنا قسمت اللحمه نصين
شي قطعته قطع صغيره وش خليته على حجمه الكبير
عشان احطه بالاخير ويكون فوق القرصان
خضار مشكله(كوسه / قرع / فاصولياء / جزر.. )
بهارات مشكله (حبتين ليمون اسود / كمون / فلفل اسود / مكعب ماجي/ ملح )
4 قرون فلفل حار / صلصه
الطريقة لعمل مرق القرصان :
اول شي تكشنين البصل بعدين تحطين اللحم وتخلينه يطبخ ثلث ساعه
ثم تضيفين الخضار والبهارات والفلفل عليه
وتخلينهم يطبخون لحد مايستوي ويصير تمام 
وبكذا نكون انتهينا من مرق القرصان وهذي صورته
وكمان تحتاجين لـ كرتون قرصان وهو اساس الطبخه
وايضا نحتاج بصل مقطع صغير ومكشن بنص اصبع زبده وبعد ما يتكشن تضيفين له ملعقه كبيره ليمون اسود مطحون
الطريقه لعمل القرصان :
تجيبين حلة قرصان أو باديه
و تحطين مغرفة من المرق والخضار الموجود عندك
وبعدين تحطين فوقها قرصان بعد ما تكسرينه
تحطين فوق القرصان قرابة المغرفتين من المرق
وبعدها ملعقتين من كشنة البصل والليمون الاسود
وتكملين بنفس الطريقه
تحطين طبقة قرصان
بعدين مرق وخضار ولحم صغار
بعدين كشنة البصل والليمون وهكذا
وباخر طبقه تحطين قطع اللحم الكبيره فوق
وتحطين الحله على النار
وتقصرين عليها لمدة نص ساعه
وبكذا نكون انتهينا من عمل القرصان
ويارب صحتين وعافيه على قلب اللي اكله
