كيكة الدخن الصحية
بواسطة: عبير العميرة
تاريخ الوصفة: 19/12/2019
كيكة الدّخن الصحّية سهلة ولذيذة جداً |
لعملها :
كوبين دخن مطحون ناعم
رشة ملح
م ك بيكنج بودر
نص م ص بيكنج صودا
نص كوب طحين جوز الهند أو اللوز
ننخلهم مع بعض ونخليهم على جنب .. .
* نجي للمقادير السائلة /
ملعقة كبيرة بذور الشيا نخلطها مع ثلث كوب ماء ونتركها شوي لين يثقل القوام ويصير لزج
بعدين نضيف ربع كوب زيت جوز الهند + نص كوب دبس تمر + كوبين ماء .
نخلطهم مع بعض بالسلك اليدوي
ونضيف عليهم المقادير الجافّة وخلصنا
صار عندنا الخليط جاهز
الحين على راحتك تبين صينية كبيرة أو كب كيك نفس ماسويت
وزّعت الخليط وأضفت بالنص حبة تمرة ورشّيت سمسم مع شوي حبة سوداء
ثم ندخلهم فرن مسبق التسخين مشغل من تحت
بالرف الوسط على درجة حرارة 180° تاخذ من ربع ساعة إلى 20 دقيقة بالكثير .
ألف صحه وعافية على قلوبكم 💓
بعض الملاحظات /
1- إذا ماعندك حساسية من البيض استخدمي بيضتين مع شوي فانيلا بدل بذور الشيا .
2- إذا ماعندك طحين اللوز أو جوز الهند ممكن تضيفين أي دقيق بس يكون خالي من الجلوتين إذا تهتمين تكون الوصفة صحّية .
3- الدّخن ممتاز وصحّي بس أبد ماينفع للي عندها كسل بالغدّة .
