فطوري في رمضان لاهل زوجي بالصور

طريقة عمل فطوري في رمضان لاهل زوجي بالصور






مساء النور والخير والبركة

المهم ياطويلات العمر رمضان الماضي كانوا عندي أهل زوجي ( أبــــو الغــــالي وإخــوانـــه ) على الفطور ..

و أنزل سفرتي لكـــم تشوفوها ..

سفـــــرتي عبـــــاره عن :

الفطـــــــــــور الأول بعد اذان المغرب :

القهوة

المــــويه

التمـــر

حلى الأخت مرت الدب المملــوح


أما الفطـــور الثــانـي بعد صلاة المغرب :

الأطبـــاق الرئسيــة /

الرز الإيــراني

صينية مكرونة

إيـــدام المعرق


المقبـــــلا ت /

شـــــــوربــــة الشــوفان الحمرا باللحم

سمبوسة بف لحم

كفتة بطاطس بالدجاج والجبن

سبيرنغ رول جبن وزيتــون

سلطـــة

خبزة فرن ( خبـزة أهــل الجنوب )

ساندوتشـــات التورتيلا

كب كيك مالـــح بالدجــــاج

الحـــــلى /

حلى باسكن روبنز

( من كتــاب أطباق النخبة , أعجب أبو الشباب وإخوانه مررررره , صح إنه مو جديد بس حلو ويشرف على السفــــره )


بالإضـــافة للعصيــرات ..


الــآن أخليــــكم مع الصـــــــــــــور :

الفطـــــــــــور الأول :



الشوربــــة :



طريقة الشوربة هنا

شوربة الشوفان باللحم بالصور


صينيـــــة المكــــــرونــــة :



طريقة صينية المكرونة

المقادير: مكرونه كيس كامل ,صحن دجاج فيليه نص حبه من فلفل اخضر واصفر واحمر بصله وسط حبة جزر كبيره مبشوره 4 ملاعق صلصه 4 ملاعق زيت نص ملعقه من كمون فلفل اسود بابريكآ ملعقه كبيره ملح غير ممتلئه

المكرونه نسلقهآ مع علبة مآجي 3 ملاعق كبيره ونحط صحن الدجاج بعد ماقطعناه مكعبات مع 4 ملاعق زيت ونقلبه حتى يتغير لونه يصير ابيض زي كذآ وبعدين نضيف البصل ونقلب..الي مايحبون البصل يجي بين المكرونه تقدرين تستغنين عنه وماتضيفينه ونقطع فلفل احمر واصفر واخضر ولو فيه ازرق حطي ونضيفه على الدجاج ونقلب وبعدين نحط الجزر المبشور ونحط الصلصه ونقلب شوي ونضيف البهارات كمون وفلفل اسود وبابريكا وملح ونقلبها شوي ونحط الخلطه على المكرونه المسلوقه مسبقآ

الحين نسكبها في صينية بايركس كبيره ونبشر جبن كرآفت علبه او علبتين على حسب الرغبه ونحطها فوق المكرونه وندخلها للفرن شوي من فوق حتى يذوب الجبن ونطلعها طعمها مع الجبن خرآآآآآآفه

الرز الإيـــرانــــي :



طريقة الرز الايراني

قطعي بصل شرايح لين يحمر
_ ضيفي عليه جزر مبشور ومكعب ماجي
_ وخليه دقيقتين.عقب ضيفي دجاجة مقطعه ومنزوعه الجلد وخلطي وخليه لين يتغير لون الدجاج للابيض الحين البهارات.حطي فلفل اسود وفلفل ابيض وبابريكا بودر وفلفل احمر بودر وكمون شوي وبهارات البرياني وشوي ملح. وكزبرة بودر,وقطعي اشبنت تقريبا 3 ملاعق كبار وخلطي كل المقادير واخر شي حطي صبغ الزعفران وشوي كركم وقطعي طماط وغطي الجدر على نار هاديه تتسبك
_ في مقلاة احرقي ملعقتين سكر بعد مرور عشر دقايق على الخلطة
_ وصبي على الدجاج وردي غطيه يكمل السواء عشر دقايق ها ونسيت اقول ربع كوب ماي في الجدر مع السكر ضيفي والحين غطي خلاص وخليه على نار متوسطه
اسلقي رز نص سلق مع ورق غار وحب هيل
_ وحطي ع الدجاج وفي كاس زعفران منقوع في ماء ورد رشي على وجه الرز
_ وغطي الجدر بورق قصدير وصكي علية بالغطا وعلى نار هاديه وخلاص
واتمنى يعجبكم وتجربونه

إيـــدام المعـــــرق :



طريقة المعرق هنا

المعرق


سمبوســـة البف :


طريقة السمبوسة البف هنا

سمبوسة البف بالصور خطوة خطوة


كفتـــة البطـــاطس بالدجـــاج والجبن + سبيرنغ رول جبن :



طريقة كفتة البطاطس بالدجاج والجبن :

3 حبات بطاطس مسلوقة زين بقدر الضغط ربع ساعة , بعد ماتنسلق وتبرد أقشرها وأبشرها وأضيف لها دجاج مسلوق ومنتف نتف صغيره من قبل واشوية ملح وبهارات مشكلة وكمون وبابريكا وفلفل أسود وأعجنها زييييين وبعد كذا آخذ من العجينة كوره صغيرة وأجوفها وأحشيها جبن مازوريلا وأرجع اكورها وأطبطب عليها ( ممكن بدل ماتحشيها جبن تخلط جبن المازوريلا معها .. أسهل عليك ) بعدها تغمسيها في بيض بعدها بقسماط وتقليها في زيت حامي وتقلبيها لين يصير لونها ذهبي تخرجيها من الزيت على ورق ماص وتتركيها لين تبرد بعدها تشكيها في أعواد الشوي وتقديميها بطريقتك .


السلطـــة :



طريقة السلطـــة :

جدا عادية وبسيطة : مجموعة خضار قطعتهم عيدان .. طماطم خيار جزر خس فلفل رومي كل الألوان
ملحيهم وحريكيهم بعدها صبيها في زبدية تقديم وحطي على الوجه بطاطس عيدان واشوية زبادي ورشة سمـــاق .


كب كيك الدجـــاج من سلفتــي :



طريقة عمل كب كيك الدجاج

المكوّنات

توست ابيض
صدور دجاج
بصل
فلفل رومي
ملعقه ونص صويا صوص
ماجي
بهارات
2 ملعقه كبيره خل
3 ملاعق كبيره قشطه
5 ملاعق كييره جبن سائل
3 ملاعق مايونيز

الخطوات

نحمس البصل ونضيف الدجاج والماجي والبهارات ثم الفلفل الرومي و الخل

اخر شي نضيف صويا صوص ونخليها على نار هاديه الين تنشف

نحظر الصوص الابيض نخلط الجبن والقشطه والمايونيز مع شويه فلفل اسود

نجيب حبات التوست ونقطعها دواير ونرصها بصينيه الكب كيك

نحط بالقاع الصوص الابيض ثم خلطه الدجاج

نحط الصوص الابيض مره ثانيه وشوي موزريلا حسب الرغبه

تحمر في الفرن من الاعلى فقط


ساندوتشـــات التورتيـــلا كمــــان من سلفتي :



طريقة عمل سندوتشات التورتيلا

المكوّنات

4 خبز التورتيلا
مايونيز
كاتشاب
2 صدر دجاج
ملح بهارات ايطالية
ثوم
1م زيت
بطاطس مقلي
1 بصل

الخطوات

تتبل قطع الدجاج باللبن والثوم والبصل والهارات لمدة ساعة

تدخل الفرن وبعد ان تنضج تقطع شرائح رفيعة

يقسم خبز التورتيلا الى قسمين بالنص

في مل قسم نضع الدجاج ثم الكاتشاب والمايونيز والبطاطس ثن تقفل بواسطة الدقيق والماء

تدهن بالحليب المركز وتخل الفرن فقط للتحمير تقدم وبالهناء والعافية


خبزتــــي :


طريقة عمل الخبزة الجنوبية

في زبدية حطي 3 أكواب دقيق أسمر منخول ضروري + م ط مليانه خميرة فوريه + اشوية ملح + 2 ونص كوب مويه عادية ويمكن زيادة اشويه (في نفس كوب الدقيق تقدرين الموية )

الطريقة : حركي الجواف مع بعض زين بعدها صبي كوبين بس من الموية واعجني بيدك زين وبعدها صبي باقي نص الكوب الباقي من أول بالتدريج واعجني زين لغاية ماتسير عندك عجينة شبه رخوة بس على أثقل اشوي ( أثقل من عجينة القطايف والبان كيك بشويه ) وبعدها غطي عليها بغطا ومنشفة وحطيها في مكان دافي لمدة ساعة كـــاملة , بعدها تلاقينها انتفشت بس لما تجي تصبيها في الصينية بللي يدك اشوي بالمويه وحركيها وصبيها في صينية تيفال صغيرة خالية من المخشات عشان تطلع منفوشة وعشان تنقلب معاك لما تنضج , رشي عل الوجه اشوية سمسم أو حبة سودا ودخليها الفرن من تحت أول على نار هادية لمدة ثلث ساعة بعدها قوي النارعلى نار متوسطة لغاية ماتنضج من تحت وبعدها شغلي النار العلوية على نار متوسطة , بس خليك جنبها لأنها راح يحمر الوجه بسرعة .. وخرجيها وقطعيها وقدميها .

حلى بـاسكــن روبنـز :


طريقة حلى باسكن روبنز :

جيبي الصينية المستطيلة العميقة اللي ماخذه شكل الحلى اللي على السفرة ( حجم وسط ) ( اللي يسون فيها خبز التوست وكيك العائلة زمأأااان ) وغلفيه بالجلاد او اللاصق زي مايقولون وخليه يطلع من جميع الجهات وكسري فيه 1 بسكوت أولكر الحجم الكبير تكسير عشوائي وبعدها صبي عليه الخلطة بالتساوي وارجعي غلفي الوجه زين بالجلاد ودخليه الفريزر ليلة كاملة وعند التقديم خرجيه من الفريزر بثلث أو نص ساعة واقلبيه بشويش في صحن تقديم وزينه بشكولاته .. جالكسي مبشور .. فلك مفتت .. واعصري هيرشي السائلة .
الخلطة هي : في خلاط مولونكس الجك حطي فيه 2 علبة قشطة حجم 170 جم + 6 حبات جبن كيري + 1 علبة حليب نستله المركز واخلطيهم زين مرررره وصبيهم على البسكوت


وبكذا خلصت ..

وفي النهاية اتمنى سفرتي تكـــون أعجبتكم .. والله يديمها علينا من نعمه .. كل اللي أبغاه منكم دعوة من القلب بإن الله يناولني اللي في بالي ويحفظ لي زوجي و ابنائي وأهلي ..

في أمـــــــــــــــان المولى