مسقعة مصرية بالصور
بواسطة: بحب بلدي
تاريخ الوصفة: 11/01/2016
أسعد الله أوقاتكم بكل خير
طريقتي للمسقعه مختلفه ولها طعم جميل
متسبكه ومتحبشه(اشرحي معني الكلمتين)
لا بجد طعمها لذيذ وتفتح النفس
وأي حد ياكلها عندي لازم ياخد طريقتها
المهم عندي نوعين او طريقتين للمسقعه وهما الاثنين. روووعه
1 - مسقعه بالطريقة العاديه
2 - مسقعه رووووول
المقادير :
باذنجان
طماطم
ثوم
حمص مسلوق
ملح وشطه وبهارات
الطريقة:
للمسقعه العاديه نقطع الباذنجان دوائر
وللمسقعه الرول نقطعه شرايح طوليه
وننقعهم في مايه وملح عشان مش يشرب زيت كتير
ثم يقلي ف الزيت
ونجهز الصوص المميز برائحته وطعمه
نفرم الثوم ونشوحه في شوية زيت
ثم نضيف الطماطم المعصورة
وكمان بقطع حبتين طماطم مكعبات واضيفها لما بتستوي بيكون الصوص سميك وقطع الطماطم
باينه وطعمها واخد من كل النكهات
ثم نضيف الملح والكمون والشطه المجروشه والفلفل الاسود
ونسيبها ع النار لغاية ماتتسبك والصوص يتقل ويكون سميك
وللمسقعه الرول بضيف لها حمص مسلوق
بيدي طعم خطير
وعلي فكرة انا الاول كنت بحط التوم مع الطماطم والبهارات واسبكهم ع النار وكانت حلوة
ولكن قلت خليني اجرب أني اشوح الثوم في الزيت الاول
لقيت النتيجه مبهرة لان ريحه الثوم بتظهر ونكهته اوضح
الصراحه طلعت اجمل واجمل
بالنسبه للمسقعه العاديه
نرص في صينيه طبقه من الباذنجان المقلي
ثم طبقه من الصوص
ثم باذنجان وبقطع طماطم واضيفها
وع الوجه الصوص
وتزين بشرائح من الفلفل العادي او الحار حسب الرغبه
وندخلها الفرن
[ المسقعه الرول]
نقطع شرايح بطاطس رفيعه ولو كانت سميكه حطيها مع الصوص تستوي شويه
انا قطعتها سميكه شويه وحطيتها مع الصوص
نرص ف الصينية طبقة بطاطس وفوقها شوية صوص
ونضع جزء من الحشو ع الباذجان المقطع بالطول ويلف رول
ثم يرص فوق البطاطس والطبقه الاخيرة الصوص
والصور توضح
وندخلها الفرن
دي النتيجه النهائيه
وهنا قدمتها مع الخبز ومخلل الليمون
ودي المسقعه الرول
وهنا من الاعماااااااااااق
اقرب واقرب
واااو
الصراحه المجموعه الميكس طعمها رهيب
يعني تخيلي كده وانتي بتاكلي بطاطس مع الحمص والباذنجان والصوص
والله الطعم متناسق ومتناغم مع بعضه
وهنا لما بكون عامله دايت
بحب اكلها بالمعلقه
ياسلام
رهيبه
والطبق ده لكل البنات الحلوين اللي هاينوروا موضوعي
أتمني تجربوها
لانها بجد تستحق التجربه ومتأكدة انها ان شاء الله هاتعجبكوا
وف الختام
ولاتنسوني من دعواتكم الصالحه
في أمان الله
أختكم
