صينية الدجاج مع مكعبات البطاطس
بواسطة: عبير العميرة
تاريخ الوصفة: 08/01/2016
صينية الدجاج مع مكعبات البطاطس لذيذه بعنف من يدين مآمآ وسهله مره عشان كذا حبيت أنزّلها لكم بتعجبكم لو طبقتوها
.
.
-المقادير و الطريقه لعمل صينية الدجاج :
١- ٦حبات بطاطس متوسطه مقطعه مربعات و تسلقونها نص استواء وتخلونها على جمب .
٢- دجاجه تقطعونها مع العظم قطع صغيره وتتبلونها بليمون وخل وملح وثوم بعدين تحمسونها مع بصل مفروم وتضيفون فلفل بارد مقطع شرائح وشوي كمون وبهآرات تندوري وبهارات ايطاليه وكزبره ناشفه وفلفل أسود ومعجون طماطم و تخلونها تتسبّك ويكون فيها مرق شوي .
٣- بعدين تجيبون الصينيه اللي بتقدّمون فيها و تحطون البطاطس المسلوقه وفوقه كميّه من جبن الموزريلا وفوقها الدجاج والطبقه الاخيره تصبّون على الدجآج كريمة طبخ حجم صغير وتغلفون الصينيه بقصدير و تحطونها في فرن من تحت متوسط الحراره ٢٠ دقيقه تقريباً و بعدين تشغلونه من فوق يتحمّر خفيف و تزينونها بالبقدونس والجزر المبشور والسمّاق .. و تتقدّم مع رز أبيض أو خبز وبالعافيه ♥ .
️ - ملاحظه :
تقدرون تصلحونها بالليل كل الخطوات وتحطونها بالثلاجه واذا جا وقت الغداء او العشاء تخلونها بالفرن تكمل استواء وتطلع ولا أروع
