لقيمات ام عزيزان

بواسطة: ام عزيزان

تاريخ الوصفة: 15/11/2015

لقيمات ام عزيزان

ثلاث طرق لعمل اللقيمات وباذن الله تضبط معاكم هذى الطرق ..... وكل وحده طعمها غير عن الثانيه والحمدالله ولا وحده منهم تشرب زيت وتبقى مقرمشه طول الوقت

لقيماتي الاولى

هي اللقيمات من اطيب ما سويت ... والحمدالله نالت على رضى كثير من البنات

بعد عناء وبعد تجارب حبيت انقل لكم تجربتي مع اللقيمات
وسويتها مرتين وطلع لي طعمها شكلين
الطعم الاول يكون مقرمش من الداخل والخارج
والطعم الثاني مقرمش من الخارج وعجينه خفيفه وطعمها حلو من الداخل
والسر في البطاط
تعالو اقولكم المقادير حطيت 2 كوب طحين ابيض

بطاطه متوسطه مطبوخه بالماء ومهروسه جيدا
و م خميره
وماء دافي 3 ملعقه نشا 2م حليب بودر 2 م كبيره زبادي 2 م زيت

ذوبي الخميره بالماء

اخلطي المواد الجافه وبعدين حطي الزبادي وبعدها الماي اضيفيه اشوي اشوي لما تتكون عندج عجينة القيمات وانا طلع معاي حوالي كاس ماء واقل من الربع ... وخليتها لما تخمر ... بعدين لما جيت ابي اصبها حطيت البطاط ... وصبيت العجينه وقليتها
هذى الطريقه تطلع مقرمشه من الداخل والخارج يعني مافيها عجين من الداخل
الطريقه الثانيه اني ما هرست البطاط بالأله هرستها بايدي وخلطتها مع العجينه وبعدين صبيتها بالزيت
واذا تبين طريقة الصب او شكلها يكون مكور ومتساوي
اعملي هذى الطريقه التي اخذتها من ام خالد جزاها الله خير
خذى كمية من العجيين بيدك اليسار كانك تعصريها...............ثم بيدك الثانية تكون معك ملعقة صغيرة وجنبك فنجان زيت ........غمسى الملعقة بفنجان الزيت ثم اقطعى من العجيين التى فى يدك
وارميها بالمقلى
خليها اشوي لما ينزل منها الزيت وعلى ما تصبين الدفعه الثانيه حطي الدفعه الاولى بالشيره
وهكذا لما تخلصين المقدار
والمقدار هذا راح يصير دفعتين
شوفو صورتها

http://www.encyclopediacooking.com/upload_recipes_online/uploads/images_%D9%84%D9%82%D9%8A%D9%85%D8%A7%D8%AA-%D8%A7%D9%85-%D8%B9%D8%B2%D9%8A%D8%B2%D8%A7%D9%862.jpg

لقيماتي الثانيه

لقيمات اللبن

2 كاس دقيق هوم بريد الكيس الازرق ( وجربتها بالطحين العادي )

ا م وسط خميره مذوبه في ربع كاس ماء دافي مع م وسط سكر

ولبن دافي استعملت لبن البيت (اللبن المقصورد هنا هو اللبن الحامض ) ... يعني تاخذين مقدار كاسين وتخلينهم بره يدفون في جو المطبخ

و 3 ملاعق نشا

الطريقه :

نخلط المقادير مع بعض لما تتكون عندنا عجينه متجانسه وسائله نوعا ما ... مو شرط تستعملين الكاسين اللبن كله .... صبي على العجينه اشوي اشوي حتى تتجانس معاج

وخليتها تخمر لمدة ساعه الا ربع .... بعد تغطيتها طبعا وحطيتها في مكان دافي

صبيتها في الزيت الغزير والحار ... وعلى نار هاديه صرت احرك فيها وكانت هذى النتيجه

وطعمها لذيذ مابين الحموضه والحلو ( مابين اللبن والشيره )

ومثل ما شايفين تطلع مقرمشه من الخارج وعجينه من الداخل

وبالاخر ممكن ترشين عليها هيل ناعم او سمسم

الطريقه الثالثه

http://www.encyclopediacooking.com/upload_recipes_online/uploads/images_%D9%84%D9%82%D9%8A%D9%85%D8%A7%D8%AA-%D8%A7%D9%85-%D8%B9%D8%B2%D9%8A%D8%B2%D8%A7%D9%866.jpg

وكل وحده يختلف طعمها عن الثانيه

وان شاء الله تكون طريقتها مضمونه لما تجربونها

واطلعت حلوه ومقرمشه على الاخر وفاضيه من جوه

المقادير :

1 م خميره 1 م كاستر 2 ك طحين ابيض 1 ونص كوب ماء دافي 2 م نشا

رشة سكر

الطريقه :

نعجن كل هالمقادير ... ونتركها حتى تخمر انا خليتها ساعه

ما صورت شكل العجينه وهي خامره .... لكن هذي بعد ما اخمرت وقاعده اصب منها بالزيت

نحط الزيت على النار لما يسخن ... وبعدها نبتدي نصب اللقيمات ... انا لاحظة ان الطحين الابيض اشوي يطول على النار يعني ما تتحمر بسرعه ... وهذا افضل حتى تاخذ اللون الذهبي ...وابدي حركي فيها حتى تاخذ اللون الذهبي من كل الجهات ... بعدها نحطها في المصفى ... وبعدها بالشيره ... وهالخطوه نسويها بعد كل مجموعه من الصب ... يعني مو تنطرين تخلصين كل اللقيمات وبعدين تصفينها وتشيرينها لا خلي كل مجموعه تسوينها تصفينها اشوي وتحطينها بالشيره

بالاخر راح تطلع بهذا الشكل ومقرمشششه حيل ... وحتى لليل وهي مقرمشه ... رشي عليها اشوي هيل وزينيها بالسمسم

طريقة الشيره سهله وانا دايم اسويها بكميات كبيره واحفظها في برطمان بالثلاجه لوقت الحاجه او في مكان بارد لان مطبخي مكيف

وكثيره هي طبعا استخدامات الشيره

8 كاسات سكر

لاتقولين وايد ممكن تسوينها بنص المقادير

4 كاسات ماء

وعصير نص ليمونه

اضيف عليها الهيل ( اختياري )

زعفران (اختياري )

صبغة زعفران (اختياري )

اضعها على النار ولما تبدي تغلي خمس دقائق اجربها اذا صارت او لا

وتراها تصير بسرعه يعني ما اطول لان مقاديرها مضبوطه

واللي حابه تسوي مقدار صغير تسوي نص المقدار

والقاعده لعمل الشيره هي

2 كاس سكر بكاس واحد ماء

وانا احط الزعفران في البرطمان ولما تدفي اشوي اصبها فيهيطلع لونها احمر وريحتها تجنن ودايم احفظها بالثلاجه
ملاحظاتي باللقيمات :

تعتمد على نوع الطحين : الطحين يفضل يكون الطحين الابيض وليس الفاخر تبع الكيك

وعلى الاظافات : مثل ما شفتوا الاظافات من حليب ونشا وكستر

وعلى التخمير : مدة التخمير مهمه ... تغطى وتترك في مكان دافي لمدة ساعه الى ساعتين حسب درجة الحراره... وعند الصب نمزج العجينه حتى نتخلص من الفقاعات

وعلى الخميره : انا استعمل هذا النوع

وعلى العجن : يجب ان تعجن جيدا وتضرب جيدا

وعلى التلقيم : طريقة التلقيم سهله
حطي عندك ملعقة النايلون البيضه مالت المطاعم عرفتيها؟؟ او ملعقة وسط ...وحطي جنبك طاسه فيها اشوي زيت وطاسة العجين واكيد المقلى اللي فيها الزيت الساخن على نار هاديه ...
تعصرين العجينه وراح تخرج العجينه من المكان بين السبابه والابهام ... وتقريبا راح تخرج بشكل الكوره .... تاخذينها بالملعقه التي غمسناها بالزيت ... عشان لما تصبينها بالمقلى تنزلق وتنزل بسرعه وما تلصق العجينه بالملعقه .... وان شاء الله تكوني فهمتي الطريقه راح تكون الكور متساويه وشكلهم مكور
ملاحظه مهمه : ابدا لا تستعملين الماء في صب اللقيمات دائما استعملي الزيت لان الماء راح يصير نار ويفرقع مع الزيت الساخن

وعلى التقليب بالزيت : لازم يكون الزيت غزير وتكون النار هاديه وساخنه... وتحركي فيها حتى تاخذ اللون الذهبي من كل الجهات ... وكل ماطولت راح تصير مقرمشه اكثر

وعلى الشيره : مهمه تكون مضبوطه ويكون سمكها وسط ... يعني ماتكون خفيفه ولا ثقيله ...

والاهم ان اللقيمات ما تتغطى بعد ما نسويها