كيكة التمر اللذيذة بصوص التوفي
بواسطة: عبير العميرة
تاريخ الوصفة: 24/10/2015
كيكة التمر الدافيه اللذيذه تقدّم مع الآيسكريم +صوص التوفي وجوز البيكآن - .
.
على ضمانتي شي خرافي
يبيض الوجه ومع القهوه العربيه كيف ع الآخر
وأنا أصلحها لخوآتي يقولون المطبخ ريحته كأنه كوفي مره فكره جميله تقديم الآيسكريم مع الكيكه وهي دآفيه كل اللي ذآقوها أهلي وجيرآني مايتركون ولا قطعه منها .
تخيلو شي دآفي وقطع تمر صغيره تطلع لكم مع الكيكه ونكهة قرفه على آيسكريم وتوفي وجوز البيكان وفنجان قهوه وقسسسم شي كآيف .
.
شفت سعآدة أمي و خوآتي اليوم وانسجآمهم مع الكيكه وتشوقت انكم تطبقونها واشوف ردّة فعلكم لمن تذوقونها
كل هذا الكلام عشان تسوونها وأنتم مغمّضين .
.
- الطريقه :/ تنقسم إلى أربع مراحل ..:
* ( المرحله الأولى ) :
تجهيز صوص التوفي
- طريقتي /
نجيب قدر ونحط فيه كوب سكر + فنجال قهوه ماء + ملعقة شاي ( ملح ) ونخليه ع النار لين يصير لونه ذهبي مايل للبني فاتح بس راقبوه زين وبعدين نضيف ربع اصبع زبده + نص كوب كريمة خفق ونخلط بالسلك اليدوي بسرعه وخفّة يد لين يتمازج ويطلع عندك توفي ولا ألذ
* ( المرحله الثانية ) :
نجيب زبدية أو صحن عميق ونحط فيه /
كوب طحين أبيض + ربع م ص بيكنج بودر + م ص قرفة .
ونخليها على جنب .
. * ( المرحله الثالثة ) :
نجيب قدر ونحط فيه كوب ونص تمر معجون أو عادي أي نوع ( سكري ، خلاص .. الخ ) ونضيف عليه كوب ماء + م ص بيكربونات الصوديوم .
ونخلطه على نار هاديه لين يذوب التمر وينسجم مع الماء يصير مهروس ولو فيه قطع صغيره عادي .
. * ( المرحله الرابعه ) :
نجيب صحن عميق ونخفق اصبع زبده ١٠٠ جرام ( بحرارة الغرفه + كوب سكر بني فاتح واذا خلطناهم مضبوط نضيف بيضتين + م ص فانيلا ، ( البيض نضيف حبه ونخلط لين تختفي ثمن نضيف الثانيه ) .
.
بعدين نجيب التمر وهو ساخن ونضيفه ع خليط الزبدة والسكر ونضيف معه الطحين ، يعني المرحله الثانيه والثالثه نخلطهم مع المرحله الرابعه و نخلط على درجه بطيئه لين يختلطون مضبوط .
.
بعدين نجيب أي قوالب أو أكواب تدخل الفرن نحط فيهم شوي من صوص التوفي ونحط فوقه من خليط الكيك تقريباً ثلثين القالب لأنه راح يتضاعف لازم ننتبه لهالشي !
بعدين ندخلهم لفرن مسبق التسخين على درجة ٣٥٠ بالرف الوسط ونشغله من تحت .. جلست تقريباً نصف ساعه بالتمام
أول ماتطلع تقدرون تكتفون بشوي توفي مع جوز وتمر للتزيين أو نفس فكرة تقديمي كورة آيسكريم وتوفي وجوز البيكان .. واستمتعووو باللذآذه .
.
جعلها بألف عآفيه يارب على قلوبكم
