طريقة عمل بودنج الفراولة بالصور خطوة خطوة
بواسطة: الشيف مونى
تاريخ الوصفة: 09/07/2015
وصفات المثلجات والوصفة دى بالفراولة مناسبة للصيف والحقوا اعملوها قبل الفراولة ماتخلص من السوق والوصفة دى اخدتها من الشيف/نرمين هنو على قناة فتافيت
المكونات:
17 قطعة خبز توست(ممكن يزيدوا او ينقصوا)
3 كيلو فراولة
كيلو سكر
4 معالق صغيرة جيلاتين بودرة مذوبين فى قليل من الماء البارد
طريقة عمل البودنج :
قبل الوصفة بيوم هنحط الفراولة والسكر مع بعض فى حلة كبيرة ونحطهم فى التلاجة عشان الفراولة تجيب ميتها
وبردو قبل الوصفة بيوم هنقطع اطراف العيش التوست ونحطه برة التلاجة عشان ينشف
تانى يوم هنطلع الفراولة من التلاجة هنلاقى السكر معظمه داب والفراولة بقت فيها ميه كتير
هنشغل عليها نار هادية لغاية ماتدبل وقبل مانطفى هنضيفلها الجيلاتين اللى متدوب فى ميه ونقلب ونطفى
وهنجيب اناء حجمه متوسط وهنغلفه من جوه بالكامل بالكلينج فيلم ونحط فى قاع الاناء وفى الجناب العيش التوست اللى نشفناه
وهنغرق الخبز التوست بالميه اللى طلعت من غلى الفراولة وبعدها نحط فى وسطه الفراولة لغاية اخر حته فيه يعنى نملاه
وهنحط فوق الفراولة بقية العيش التوست وعليه مية فراولة واحنا نشفنا العيش التوست فى الاول عشان لما نحط عليه مية الفراولة ميتقطعش
ونغطيه من فوق بالكلينج فيلم
وعشان يتماسك هنحط عليه طبق تقيل وهنحطه فى الفريزر لمدة يوم كامل
بالنسبة للفراولة ممكن تكونوا شايفين ان 3 كيلو كتير بس هى يادوبك مش كتير ولا حاجة خالص لأن الكمية بتقل بعد مانغليها
والجيلاتين البودرة متوفر فى اى محل بيع خامات حلويات ولو ملقتهوش ممكن تستبدلوه ب2 باكيت جيلى فراولة
قلبتها بعد ماجمدت على طبق التقديم وزينتها بور مجفف وده شكلها النهائى
خفيفة وحلوة وسكرها معتدل جربوها هتعجبكم
وبالهنا والشفا
