طريقة عمل الفطائر بعجينة الفطير السويدي بالصور خطوة خطوة
بواسطة: الشيف مونى
تاريخ الوصفة: 09/07/2015
طريقة عمل الفطائر بعجينة الفطير السويدي بالصور خطوة خطوة
معظمنا فى رمضان بيحب الفطاير والمعجنات فعملت فطاير بعجينة الفطير السويدى لانى بحب طعمها وان شاء الله تعجبكم
مكونات العجينة:
2 كيلو دقيق نصف كيلو زبدة طرية 2 ملعقة كبيرة بيكنج بودر ماء للعجن للحشو: سبانخ سوسيس لحم جبنة رومى جبنة موزاريللا جبنة كيرى جبنة بيضاء مالحة او حسب الرغبة ولدهان الوجه هنحتاج بيضة مخفوقة وفلفل اسود الطريقة: هنجهز ادوات تقطيع العجينة وتشكيلها
وفى اناء هنحط الدقيق والبيكنج بودر والزبدة
ونفرك الخليط ده كويس بايدينا او فى العجانة لغاية الزبدة ماتدخل فى كل كمية الدقيق
ونضيفلهم ماء العجن بالتدريج
لغاية ماالعجينة تبقى حته واحدة وهتكون طرية وناعمة
ومش محتاجين نسيب العجينة دى ترتاح او تختمر هنشتغل بيها ع طول هنبدأ نفردها عشان نشكلها
واول حشوة عملتها بالسوسيس وشكلت العجينة بطرق مختلفة وحاطة طريقة التشكيل بالصور عشان تكرروها اذا حابين والسوسيس قبل ماأحطه ع العجينة ساويته على النار فى مقلاة مع شوية ميه ونقطتين زيت
وبعد مانخلص حشو هنحطهم على صينية مدهونة وندهن وشهم ببيضة مخفوقة وفلفل اسود
وهنبدأ نعمل حشوة السبانخ والسبانخ بردو ساويتها كويس شوحت بصلة مع زيت على النار وحطيت عليهم السبانخ المتقطعة وغطيت عليهم وسبت السبانخ تستوى فى ميتها والكمية حسب رغبتكم عشان كده مش محددة كميات
وهعمل حشوة الجبنة البيضاء وحبيت اعملها ع شكل كورن هنفرد العجينة ونقطعها شرايط رفيعة
ونجهز الاقماع الاستلس اللى هنلف عليها العجينة
وهناخد اى شريط عجينة من اللى قطعناهم ونبدأ نلفه على القمع الاستلس
لغاية ماتخلص كل الكمية
وهنعمل حشوة الجبنة الكيرى هنفرد العجينة ونحط على جزء منها الجبنة الكيرى
ونطوى الجزء الفاضى على اللى فيه الحشو
ونفردها بالنشابة ونقطعها شرايط
ونقسم الشرايط دى بالنص
ونلفها مرة او مرتين
وهعمل حشوة الجبنة الموزاريللا بشكل مختلف زى ماهتشوفوا معايا
واخر حاجة حشوة الجبنة الرومى هنفرد العجينة على شكل مربع وهنحط عليها الجبنة الرومى المبشورة
وهنلفها على شكل رول
وهنقسم الرول ده بالطول من النص
ونضفره
ونلفه
بعد ماخلصنا تشكيل العجينة هندخلها فرن متوسط الحرارة ومسخن مسبقا لغاية ماتستوى ووشها يحمر وعارفة ان الكل هيسئلنى هى العجينة دى مفيهاش خميرة؟ايوة عجينة الفطير السويدى بالبيكنج بودر ومفيهاش خميرة وطعمها غنى جدا لانها بالزبدة بس انتوا تقدروا تعملوا نفس الحشوات والاشكال بعجينة العشر دقايق بس بالنسبالى العجينة دى طعمها احلى بكتير من العشر دقايق وبالنسبة للحشوات حسب رغبتكم تقدروا تستبدلوهم باللى انتوا عايزينه وانا محددتش كميات الحشوات لأن ده بردو حسب رغبتكم وده الشكل النهائى للفطاير بعد ماطلعت من الفرن دول فطاير السوسيس والسبانخ
والكورنيهات بعد ماطلعوا من الفرن حشيتهم جبنة بيضاء بالنعناع وده شكلهم
وفطاير الجبنة الكيرى
وفطاير الجبنة الموزاريللا والجبنة الرومى
وبالهنا والشفا
