صدور دجاج محشية ملفوفة
بواسطة: عبير العميرة
تاريخ الوصفة: 12/06/2015
صدور دجاج ملفوفه وجوآتها بروكلي مع صلصة الجبن يجنن وسهل ولذيذ والطريقه فيها نوع من التجديد
- الطريقه :
١- نجيب بروكلي على حسب كمية الصدور اللي بنسويها لكل صدر زهرتين من البروكلي .. نسلقها في ماء مغلي مع الملح لمدة ٥دقايق بعدين نصب عليها ماء بارد جدا عشان تحافظ على لونها الأخضر .
٢- نسخن الفرن على حرارة ٢٠٠ درجه مئوية.
٣- نشق الصدر بالطول بسكّين حادّه ونفتحها بس مانوصل للأخير كأننا نحشي خبز صامولي ( ان شاء الله وضحت الفكره ).
٤- نحط الصدر وهو مفتوح بين طبقتين من البلاستيك ونطرقها لين تصير رقيقه .
٥- نتبّل الصدور بالملح والفلفل ثمن نرش على الصدر جبن موزريلا مبشور .
٦- نحط البروكلي على الطرف من الجهتين بحيث يكون الساق كامل داخل الصدر والزهره للخارج .
٧- بعدين نلف الصدر على شكل رول حول ساق البروكلي وننتبه الزهره تكون على برا .
٨- نرتّبها بصينية فرن ونخلط م ك فلفل احمر مطحون ( حار او بارد حسب الرغبه ) + م ك زيت زيتون وبعدين ندهن سطح الصدر بالخليط .
٩- نجيب كوب مرق دجاج او ماء بس افضل واطعم مرق دجاج وبعدين نصبّه بالصينيه حوالين الصدور ونغلف الصينيه بالقصدير ونخليها بالفرن تقريباً نصف ساعه او الين يستوي الصدر.
* الحين نجي للصوص :
١- نذوب م ك زبده ونضيف لها م ك طحين ابيض ونقلب لين تتمازج وبعدين نضيف كوب كريمة طبخ + كوب مرق دجاج ونقلّب لين يغلظ القوام .
٢- نضيف البهارات الايطاليه والملح والفلفل الاسود وبعدين نضيف جبن موزريلا والكميّه حسب الرغبه ونقلّب شوي لين يتمازج واخر شي نضيف بقدونس مفروم او مجفف مطحون ونطفّي النار .
*- عند التقديم بالصحن :
نصف الصدور ونصب كميّه من الصلصه فوقها ونخلي الباقي على جنب للي يحب يضيف زياده واستمتعو باللذاذه
وجعلها هني وعافيه يارب على قلوبكم
