عمل كشري لذيذ بالصور
بواسطة: عبير العميرة
تاريخ الوصفة: 11/06/2015
الكُشري اللذيذ على طريقة ماما أحبها هالأكله أقوى درجات الحُب
مقاديره الكشري سهله وتهبل
ويمديكم تصلحونها ع الغداء الحين
- الطريقه :
أول شي :
نسلق - كوب مكرونه بماء وملح وزيت .
ثاني شي :
نسلق - نصف كوب عدس أخضر .
ثالث شي :
نجهّز - ٣ أكواب رز مصري .
+ ربع كوب شعيريه تكسرونها وتحمسونها لين يصير اللون ذهبي .
وبعدين - نجيب قدر ونحط فيه :
ربع كوب زيت ونحمس معه بصله مقطّعه صغير ونضيف الملح وملعقة بهارات مشكله وملعقه صغيره فلفل أسود والشعيريه المحموسه والرز ونضيف عليه الماء المغلي ٦أكواب ماء تقريباً ونتركه على نار عاليه لين يغلي واذا بدت حبة الرز تطلع واضحه نقصّر عليه النار ونخليه لين يستوي
رابع شي :
نقطع كمية من البصل شرائح ونقليه في زيت بحيث يغطي البصل ويكون الزيت حامي مو بارد ونخليه على نار وسط لين يتحمّر يصير بنّي محمّر مو محترق انتبهو !
وآخر شي :
نصلح الطماطم نفس طريقة طماطم البيتزا :
نخلط ٤-٥حبات طماط وسط مع ثلاث فصوص ثوم وفنجان قهوه زيت زيتون
وملح وفلفل حار ( على حسب الرغبه) واوريغانو وبهارات ايطاليه وشوي فلفل اسود ..
بعدين اذا خلطناها نخليه على جنب .، ونقطع بصل صغير جدا ًونحمسه لين يذبل ثمن نصب الطماط عليه وبعدين نحط عليه صلصه ملعقتين كبار او ثلاث تقريبا ونخليه يتسبّك و نخليه ع نار هاديه لين يثقل الخليط شوي وخلصنا. :.
الحين خلصنا
نجي نحضّر طبق التقديم :
نسويه طبقات أول شي رز فوقه عدس وبعدين مكرونه وبعدين نكرر الطبقات لين تنتهي الكمية وبعدين
نزيّن الطبق بصوص الطماطم وفوقه البصل المقلي .
وبألف عافيه يارب على قلوبكم
أبد ماأحب التعذيب بس ودي تشوفونه بشكل أوضح وياسلام لو الصوص معه فلفل حار
