صينية دجاج بالفرن لذيذه
بواسطة: عبير العميرة
تاريخ الوصفة: 11/06/2015
صينية دجآج بالفرن سهله تجنن ماتاخذ وقت وطعمها أليم جربوها واحكمو وتقدرون تزيدون وتنقصون فيها على راحتكم ..
- الطريقه :
١- أول شي نسوي التتبيله :
شوي خيوط زعفران نخلط معها ربع كوب ماء عادي ( واللي يحب نكهة الورد يضيف ربع كوب ماء ورد بدل الماء العادي ) + عصير ليمون + ربع كوب زيت زيتون أو نباتي + شوي بهارات حاره + شوي بهارات مكسيكيه (اختياري ) + م ك فلفل أحمر مجروش + م ك بهارات تندوري + نص م ك بابريكا اللي هو ( فلفل أحمر الحلو مجفف ومطحون ) + شوي كزبره مطحونه + شوي بقدونس مجفف + فلفل اسود + ملح + م ك صلصة طماطم .
نخلطهم بالملعقه ونخليهم على جنب
.
٢- نجيب صينية الفرن ونقطع فيها بصل شرائح ٣-٤ بصلات وسط الصراحه كل ماكان البصل كثير شوي كل ماكان أطعم وألذذذ يتكرمل ويصير طعمه خيالي مع التتبيله ..
+ فصوص ثوم شرائح ماكان عندي ولاأضفته .
وبعدين نجيب الدجاجه وننظفها زين ونقطعها بالنص او أرباع على راحتكم وندعكها زين بالتتبيله ونحطها فوق البصل وبعدين نصب باقي الصوص فوق الدجاج ونحط فلفل أخضر حار ، ونقصدرها بالقصدير ونخليها بالفرن على درجة حراره متوسطه في الرف الوسط راح تاخذ ساعه كامله نكون مشغلين النار من تحت فقط وبعدين نفتح القصدير ونحمّرها من فوق وخلصنا
وجعله مطرح مايسري يمري
إن شاء الله تعجبكم
وحآبه أقولكم تقدرون تصلحونها وتتبلونها وتغلفونها بالقصدير وتخلونها بالثلاجه يوم كامل وبعدين تدخلونها الفرن متى مابغيتو راح يتشرّب الدجاج التتبيله أكثر ويكون أطعم
