اكلة كبسة دجاج بالصينيه بالصور

اكلة كبسة دجاج بالصينيه بالصور




طريقة عمل الكبسة :

:. من عمل ماما جميله وسهله ولذيذه وتتقدّم بالصينيه نفسها وينفع تصلحونها وتمسكون الخط ( للبر ) :. :. كثير أعجبهم شغل الصياني وهي حركه مريحه خاصّه للموظفات ترجعين من دوامك على طول تحطينها بالفرن وعلى بال ماتغيرين ملابسك الا هي جاهزه وكأنها متعوب عليها بنفس اللحظه ومثلا ً لو بيجيك احد تصلحينها قبل بيوم جربوها احسن من الشغل بنفس اليوم ولا تنسوني وماما من دعواتكم :. :. :.

الطريقه :/

١- نحمس بصل مكعبات لين يذبل .
٢- نضيف عليه ثوم مقطع شرائح رفيعه +
فلفل رومي ملون + قرون فلفل حار .
٣- نضيف الدجاج المقطّع على حسب الرغبه بدون جلد .
٤- نضيف البهارات المشكله + ملح + فلفل اسود واحمر + بهارات تندوري + كركم .
٥- بعدين نضيف الخضروات كل وحده على حسب رغبتها وبعدين نضيف شوي صلصة طماطم مع شوي طماطم مخلوط بالخلاط ونخلّيهم يتسبّكون على نار هاديه .

٦- نضيف الرز المنقوع لمدة ساعه والرز المستخدم هنا ( ابو كاس ) ونخلطه على خفيف مع الدجاج والخضروات بعدين نضيف الماء دآئماً العقده هنا ههههه كم مقياس الماء ؟
بشرح لكم مفهومي وان شاء الله اقدر أوصّل المعلومه :
طريقة اضافة الرز أول شي نخلطه مع الخضروات على خفيف لأنها كبسة لازم يختلط الرز مع الدجاج والخضروات وبعدين نضيف الماء .. يارب وضحت الطريقه لكم تمام
ودائماً مو اول مره يضبط مع كثرة التصليح ان شاء الله يضبط
نضيف الماء على الرز ونغطي الصينيه لمدة دقيقه .
اذا بدى صوت الرز يطلع نفتح غطاء الصينيه ونجيب ملعقه كبيره ونوقفها في الرز
ونراقب سطح الرز :
١- اذا كانت تظهر مع الفقاعات كمية كبيره من الرز فالماء ناقص !
٢- اذا كانت تظهر مع الفقاعات كمية قليله من الرز فالماء موزون صح
٣- اذا كان لا يظهر الرز مع الفقاعات فكمية الماء كثيره ويجب تخفيفها !

فاذا صارت وزنية الماء صح قصّرو النار إلى اصغر درجه وغطّو الصينيه واتركوه لمدة نص ساعه واحيانا اخليه الى ٤٥ دقيقه يتمسمس أكثر >> يتمسمس ماراح يفهمها الكثير امسّي عليكم بالخير وجعله هني وعآفيه يارب على قلوبكم

- ملاحظه : الطريقه نفسها تصلحونها بالقدر مو شرط صينيه .