كبة البرغل والجريش بالصور

طريقة عمل كبة البرغل والجريش بالصور

fried kibbeh recipe
هذي كبة أمي اللي تعلمتها من جدتي ربي يخليهم


مقادير الكبه /

- كيلو برغل " تركي " ناعم
- كيلو جريش " إماراتي " ناعم
- 1 حبة بصل كبيره
- 1 راس ثوم
- 1/2 حزمة بقدونس
- 2 م ك بهار مشكل
- 1 م ك كركم
- 4 م ك لحم مفروم
- ملح " حسب الرغبه "


الطريقه /

اغسلوا البرغل والجريش مع بعضهم لمدة 8 دقايق بالضبط " اذا زاد الوقت بتنفتح الكبة وقت القلي "
بعدها اشخلوهم و اعصروهم بإيدكم " نشفوه من الماي مرّه "
بعدين تقلبون الجريش والبرغل بصينية كبيره , وقطعوا البصل وحطوه بالصينيه
والثوم والبهار والملح والبقدونس واللحم .. اخلطوهم مع بعض وبعدها افرموا بفرامة اللحم ع دفعتين .

( بعدين اعجنيها بإيدك و كبّبيها وحشيها باللي تبين )

حشوة أمي /

- لحم مفروم
- بصل مفروم
- بهار مشكل
- ليمون اسود مطحون
- ملح
- كزبره مفرومه

( كلهم مع بعض عالنار ماعدا الكزبره ! , احمسوهم لحد ما يستوي اللحم بعدين حطوا الكزبره وسكروا النار )


الكبه المقليّه /

* اذا كبّبتوها وحشيتوها خلاص اذا حابينها تكون كبة للقلي فهذي الخطوات :

اسلقوها بقدر وسط ماي مع زيت + كركم + بهار مشكل + ملح ,
أول ما يغلي حطوا 10 حبات كبة أو العدد اللي يناسب القدر اللي معاج لاتكبونها كلها !



من تشوفون لونها مال للغامق شيلوها



وحطوها بمشخال عشان ينزل الماي مالها



وبعدها حطوها بصينيه عشان تبرد ..



اخير شي كيسيها وحطيها بالفريزر ومتى ماحبيتي طلعيها وعلى طول قلّيها .


كبّة المرق /


* اذا حابينها تكون كبة بالمرق : عادي بدون لا سلق ولاشي
بس كببيها وحشيها وكيسيها وبالفريزر بدون لاتنسلق يعني .

طريقة المرق /

- بصله مفرومه
- 2 فصّ ثوم مهروس
- 3 طماط
- 1 علبة صلصة طماط
- ملح
- بهار مشكل
- ليمون أسود عدِل

( بقدر احمسوا البصل مع الثوم بالزيت , واخلطوا الطماط مع الصلصه بالخلاط وصبوه
عالبصل مع الملح والبهار و أول ما يتسبّك ويغمق لونه صبوا عليه ماي شووووي تقريباً كاسين ,
أول ما يغلي حطوا الكبه بعدين زودوا الماي بحيث إنه يغطي الكبه وضيفوا الليمون
بس تستوي طفي النار " تقريباً ربع ساعه وتستوي " ) .


وبس عليكم بالعافيه يارب
ويارب يكون شرحي واضح