طريقة عمل البهارات الاماراتيه في المنزل بالصور
بواسطة: الجوري الأبيض
تاريخ الوصفة: 30/11/2014
طريقة عمل البهارات الاماراتيه في المنزل بالصور
طريقة بهارات أهل الإمارات
المقادير تنقسم إلى قسمين
القسم الأول:
الليمون اليابس
الهيل
الزنجبيل غير المطحون
الكركم غير المطحون
أول شي ناخذ الليمون ونغسله بالماء زين و على السريع لأنه مليان غبار
والكركم نفس الشي والزنجبيل
لا تقولين أنه نظيف المطحون جاهز في السوق من تغسلينه بتعرفين كيف الوسخ عليه و الغبار والأتربه
بعدين حطيهم في صحون كبيرة و وزعيهم زين و حطيهم في الشمس من الصبح إلى العصر
و إذا فيه حشرات أو طيور حطي عليهم أجلة الصلاة أو شرشف خفيفه علشان تتشمس وتنشف زين
وبعدين لما تنشف خذي الليمون الأسود و أقسميه من النصف و طلعي البذور اللي داخله لأنها تسبب مروره في الأكل
والزنجبيل أول دقيه في الهاون النحاس بعدين أطحنيه في الطحانه حقت الهيل لأنه قوي وبيكسر عليك الشفرات
والكركم نفس الشي دقيه في الهاون النحاس وبعدين في الطحانه و أشخليه في مشخله ناعمه وكل ما تجمعت كمية من الكركم الكبار رجعيه في الطحانه
و الهيل أطحنيه وحطيه في علبة
لما تخلصين من كل شي حطي الليمون والكركم و الزنجبيل في علب تحفظه كل واحد لوحدة بالطبع
القسم الثاني
هذه المقادير تكفي لمدة ثلاثة أشهر أو حسب الإستخدام
2 كيلو بقدونس الجاف
1ونصف كيلو كمون
ربع كيلو الفلفل الأسود
ربع كيلو القرفة
ورق الغار كيسة صغيرة
ربع كيلو مسمار
فلفل أحمر حار كيسة صغيرة
زنوت أو الشمر نصف كيلو اللي لونه أخضر وحبته أكبر من الكمون
وهذه صوره له من النت أوضح
وشنه قبضة يد
الطريقة
كل شي لحاله تاخذين وعاء ياعيني على الفصحى 
وتحطين البقدونس فيه وتغسلينه زين وعلى السريع بعدين تشخلينه وتحطينه في صحن كبير بحيث يتوزع زين وقدر ما يمكن طبقة واحد وتشمسينه وتسوين بباقي البهارات كذا ما عدا
الفلفل الأحمر
ولما تجف تخلطينها في صحن كبير مرة
وتحطين الفلفل الأحمر عليها
نجي للمرحلة الثانية
تاخذين قدر حجمه زين وتحطينه على الغاز وتولعين عليه لما يحمى القدر شوي حطي يملا طاسة من البهارات المشكلة و حركيها زين لما تحمر و تطلع ريحتها الحلوة نزليهامن القدر وحطي كمية ثانية لين تخلصين وخليها تبرد
هذه بعد التحمير ما هو باين الفرق كثير لكن لما تحمر و تطلع ريحتها تقريبا نحمسها لمد عشر دقايق أو أقل
نجي للمرحلة الأخير
نطحن كمية من البهارات اللي حمستيها على النار ونحط معها حبتين ليمون يابس
ونصبه في طاسة كبيرة نقدر نخلط فيها على راحتنا
مثلا علبة توزن كيلو نحط عليها ملعقتين هيل و كركم و ملعقة زنجبيل ونخلطهم زين
وباقي البهارات أحطة في علبة زجاج كبيرة و أحفظها في مكان بارد من دون طحن
لما تخلص الكمية المطحونة اسوي غيرها وفيه من يحط البصل الجاف لكن أما ما أعرف اسويه لما أتعلمه زين بحطه
صدقوني أخواتي صح شغلته كثيرة و الجاهز سهل لكن من تجربين إنك تسوينه في البيت وخصوصا لما تغسلينه وتشوفين الأوساخ اللي تنزل منه بتكرهين الجاهز وريحته وطعمه جنااااااااان و الكل يسألني عن بهراتي و من وين أشتريها
